Wednesday, May 10, 2006

باختصار....الخطيب


ندوة باسل الراشد باختصار شديد هي كالآتي

تخيل أنك تحضر حفلة تغني فيها أم كلثوم و عبد الحليم و عمرو دياب و عبدالكريم و يوسف المطرف و مايكل جاكسون أيام عزه؟

تخيل أنك تشوف مباراة يلعب فيها بيليه و مارادونا و رونالدينيو و بلاتيني و زيدان و فتحي كميل؟

تخيل انك تدش كراج فيه فيراري و بورش و لامبورجيني و رولس رايس و رانج روفر و بي أم سبعمية مع بعض؟

هكذا كانت الندوة أو الامسية الرائعة ان صح التعبير, كل من تكلم أبدع, و كلهم كانوا شاربين مشروب غريب يضاعف الجرأة في الطرح و التنسيق في الأفكار و الكلام

كل ما يطلع واحد تقول هذا المسكت و يطلع اللي عقبه أقوى منه

الى أن جاء دور الدكتور العملاق أحمد الخطيب, أنصت الجميع لما سيقوله هذا الصرح

كان موضوع الليلة هو أحداث مؤتمر جدة أيام الغزو سنة 90

فجر الدكتور الخطيب اليوم قنابل تاريخية الواحدة تلو الأخرى, منها موقف السلطة ممثلة بولي العهد من تيار الدكتور أيام الغزو

المتاعب و البهذلة التي تعرض لها في مطار جدة عندما حضر المؤتمر

أشياء و أحداث كثيرة جدا و مهمة جدا ذكرها الدكتور, اللي كان حاضر استمتع , و اللي سمعها استفاد, و اللي ما حضر و لا سمع يحاول يدورها و يسمعها

عموما الجو العام كان متفائلا و مصرا على التمسك بالخمس أو الاستقالة

اسمحولي مالي خلق أكتب زيادة بعد سماع خبر اقرار الحكومة للعشر دوائر

انشاءالله ما تكون آخر المطاف












22 comments:

A3sab said...

kan minqath wayid ew
"salla3" 3al akher ga6 qanabil wa7dah akbar min ithaniya. allah i7afthah wallah

Temetwir said...

الله يانها اقزرت على اليو تيرن الي اييك باول الشارع من بيتهم ايام الصبا

ابي ستعش ندوة واستشراف وشدة حيل بيومين لتقليص عدد الاصفار الي تتبع الرقم الاول لما تسال عن سعر عقار بالعديلية لو سمحتوا

kila ma6goog said...

السلام

أعصاب
اي والله فاجأني اليوم بجرئته, المشكلة جدامه قاعدة بيبي اليوسف و الأخ ولا بالبال حيل طايحله تلسب بالشيوخ والله توقعت تقوم تتهاوش وياه

بس اقصرت الشر و مشت

و بعدين يوم يتكلم عن الغزو و يقول جماعة الشسمة و ايأشر عاللحية و عادل الصرعاوي قاعد يمه و القاعة متروسة لحايا

جد جد اليوم باعها, بس والله دمه خفيف و معنوياته أوكي

الله يحفظه و يحفظ الكويت انشاءالله

تيمي
أي عقار و أي عديلية, الناس الحين تتكلم عن لؤلؤة الخيران و مدينة جابر و مدينة الحرير

Erzulie said...

Wow nice pics kila ma6goog. Mashallah za7ma hmm...

Q8Maverick said...

wallah we are missing alot here... hope this will carry on and they don't give up easily.. they have to remember they have to approve it..
Plus there is always article 102 of the constitution...

الحجيه said...

السلام عليكم جميعا
سمعت كم واحد يشيدون بالندوه
ولكن لاننسى المقوله التي تقول ليس كل مايقال صحيح ولاكل ما يكتب صحيح

وانشالله ربي يهدي النفوس

حتى لاتنطبق علينا الحكمه التاليه

*تكــــلم وأنـــت غــــــــــاضب ......

فستقول أعظم كلام تنـــدم عليه طـوال حيـاتــــــــــك

Zaydoun said...

وين صورتي؟؟؟؟؟

فلانة يبيلها بوست كامل، اليوم انشاءالله

nanonano said...

انا لما شفتها....حسيت ان ضغطي صار
مليون...بس أشوه يت وانغثت....بدليل أن مجموعه من الشباب اسمعوا تلعلعها من الشارع واهيه اتحلطم...شكو يايه...لا و يايبه مسجله معاها...يعني بتخوفين المتحدثين...هاهاها و لما طلعت من الدوانيه اعثرت بأحد الوايرات...عثرتها عبيطه شويه

الدكتور الخطيب أمس أشكره بط البرمه...بس لو مهما نقول ما نقدر نعطي هذا الرجل حقّه

العم أحمد السعدون...امس وجهه كان وايد معصب...و مبيّن عليه أن متضايق

و تبون الصج....بقية المتحدثين كلهم كانوا رائعين...و عكسوا حماسهم على المستمعين

و على فكره...جنّه الجمهور زاد

بومريوم said...

تلومونى فيها

هذى حوبة الكويتيات اللى ظلمتهم

Mini Я. said...

ma alooma sara7a..6ala3 7areta oo ohwa yeth7ak ebweyoohum...RAYAL!

nice pictures...ashwa ana mo embayen :P

Anonymous said...

مينونه هاذي؟
جايه بريولها لناس بيطبون باهل الى خلف اهلها؟


مطقوق اشقال الخطيب بعد؟ مايوز من خرابيطه

neelaah said...

الصور عجيبه
قواك الله
زورني اليوم

Anonymous said...

الله يعطيك العافيه

A3sab said...

alkha6eeb min quwat ilkalam kanat 6ierah boh-ti
atilaffat yimeen ew shamal ati2akkad itha fee snipers wella la2

bunaz said...

أشوه يعني اليوم مافيها " وين الفيلم واممتى الفيلم "
بس أصوررك حلوه وحياكم ترى حاط 57 صوره من ندوة الراشد

NuNu™ said...

Enta you were wearing a yellow T-Shirt lamma kinna eb GUST sa7?!

kila ma6goog said...

السلام

أريزولي
مكانك فاضي

كويت مافرك
مادري شنو المادة 102 بس أيضا أقولك مكانك فاضي و لا تخاف الشباب هني مو مقصرين ماشاءالله

الحجية
عجبني تعليقك بالساحة قبل شوي و فعلا نحتاج الى صوت الحكمة في هذه الظروف , يعطيك العافية و تأكدي انك تعملين لنا بلانس هني بين الحماس و الحكمة

جيدون
صورتك موجودة بس مو واضحة وايد , اليايات أكثر انشاءالله نصيدك و نحطك هني بس يبيلها تكتيك

نانو
أوه السعدون أمس كان شاب ضو, عندي صورة ما حطيتها لو تشوفون خزته, عيونه بتطلع

مشكلتي معاه اني ما أفهم شيقول, أحاول أشوف جسمه و حركاته عشان أعرف اذا قاع يقول شي قوي او عادي

بو مريوم
منت هيّن طلعت سيد

مني آرر
تنصاد المرة اليايه انشاءالله , على فكرة أنا صوري دبل اللي هني بس ما أحب أكرر و أحط لقطات عادية , منقي اللي يونسون

أنونمس
والله قال وايد كلام , من أبرز اللي قاله أيضا ان بوش هو اللي ضغط عالحكومة لاعادة مجلس الأمة بعد الغزو و حرص أن تكون انتخابات مجلسنا قبل انتخابات الرآسة بأمريكا كدعاية له

طبعا بطبيعته وايد متحامل عالحكومة و الشيوخ بس والله هو له نظرة يمكن احنا الصغار ما نشوفها

اهو عاصر أحمد اليابر و عبدالله السالم و صباح السالم و جابر الأحمد و الآن صباح الأحمد

يعني أكيد نظرته غير عني اللي ما عاصرت الا بو مبارك الله يرحمه

نيله
مشكورة و يايينك

أنونمس
مشكور الله يعافيك

أعصاب
والله انا كنت قاعد قريب منهم و الله ياتني فكرة ان لو الحين تنفجر الطاولة شيصيرر فيني, كان ودي أطلع بس الدرب زحمة و مالي خلق سوالف لو سمحت و عفوا و شكرا

بوناز
أخاف أقولك وين الفلم أحصلي زفة مثل أمس, توبة

يايك الحين السايت

نونو
اي أنا بو تي شيرت مالت الأسرى

لبستها لأنهم عطونا اياها بأمريكا لمن سوينا مسيرة جدام الكونجرس للمطالبة بفك الأسرى سنة 2001

و بما اننا كنا ضيوف بالجامعة و حرصت على اني أتذكر أيام الطلبة و يييت كول

cheers

الحجيه said...

السلام عليكم
كل مطقوق مشكور على الكلام الطيب

الماده 102 من الدستور
لا يتولى رئيس مجلس الوزراء اي وزارة ، ولا يطرح في مجلس الامة ، موضوع الثقة به . ومع ذلك اذا رأى مجلس الامة بالطريقة المنصوص عليها في المادة السابقة عدم امكان التعاون مع رئيس مجلس الوزراء ، رفع الامر الى رئيس الدولة ، وللامير في هذه الحالة ان يعفي رئيس مجلس الوزراء ويعين وزارة جديدة ، او ان يحل مجلس الامة .

وفي حالة الحل ، اذا قرر المجلس الجديد بذات الاغلبية عدم التعاون مع رئيس مجلس الوزراء المذكور اعتبر معتزلا منصبه من تاريخ قرار المجلس في هذا الشأن ، وتشكل وزارة جديدة .




حبيت اوضع الماده 102 بالدستور

sugar free.. said...

كله مطقوق كلامك درر .. والصراحه قاعد تخلينا في بث مباشر مع الحدث بالكتابه والصور والتعليقات المعبره ... لك جزيييل الشكر على الجهد المبذول والحس الوطني شكرا ابناء الكويت المخلصين ..

sugar free.. said...

wen n7a9el CD or nadwat ALKha6eeb ? plz..

kila ma6goog said...

السلام

الحجية
تستاهلين و مشكورة عالتوضيح

الله كريم توني ياي من فلم زرف طارق و الله الفلم عبيط بس مو أعبط من اللي قاعد يصير بالكويت

تعرفون فلم اللي نوع البطل يطق روحه و يقوا أي أح تعورت؟

نفس الشي

بدون سكر
حاضرين للطيبين ما سوينا شي
و بالنسبة للسي دي والله ما أعرف وين تحصلونه بس اهو مصور و أكيد راح ينتشر, يمكن الجزيرة يحطونه أو فلم بو ناز أو الحالف يمكن عندهم اياه

bo bader said...

يا شباب
والله رجعتوني لذاك الزمان الحلو على كل ما كان فيه من آلام
لكن بقول لكم بعض النقاط يا شباب:
1- ترى هذي أول مرة أشارك في بلوغ - ويمكن الأخيرة
مو علشان شي بس لأتي أنا من جيل الكبار في السن شوية لكن هذي الأيام رجعتونا شباب بكل هذه المواقف المبدئية علشان ديرتنتا
2- لا تفترون ولا تتنازلون عن مبادئكم
ترا احنا كبرنا والبركة فيكم الحين
احنا ناس اعيالنا بعمركم والله في الثانوية والجامعة
3- الخطيب والسعدون والنيباري وغيرهم مو دايمين
لازم انتوا تكملون المشوار والأرض اللي طلعتهم مي عاجزة تطلع غيرهم
عسى الله يقويكم وكملوا المسيرة ترى الكويت أمانة بيدينكم