Monday, March 10, 2008

حكمت المحكمة

.
حدث في عام ألفين و ثمانية و ثمانين

في غرفة معتمة الأنوار في أحد سويتات فندق أمن الدولة في منتجع جنوب السرة , وقف اثنان من الضباط اللطفاء يحققون مع المتهم كلّه عبدالله مطقوق بتهمة الخيانة العظمى و تخطيط عملية انقلاب على الحكم

المحقق : اسمك الثلاثي ؟
ك.م : كلّه عبدالله مطقوق

المحقق : عمرك؟
ك.م : جريب السلاسين , احم احم أقصد سلاثين , ثلاسين لا لا ثلاثثين

المحقق : هل تعترف بالاتهامات المنسوبة اليك؟
ك.م : أي تهمة؟ خير؟

المحقق : انت متهم بعدم الولاء للكويت
ك.م : شدراك؟

المحقق : شلون شدراني؟ أنا أمن دولة و أفهمها عالطاير
ك.م : نوّرني؟

المحقق : حاط صورة شيخ على سيارتك؟
ك.م : لا

المحقق : بمكتبك؟
ك.م : لا

المحقق : يم كرفايتك؟
ك.م : لا

المحقق : ديوانيتك؟
ك.م : لا

المحقق : بموبايلك؟
ك.م : لا

المحقق : وال بيبر بلاب توبك؟
ك.م : هم لا

المحقق : سجّل عندك , اعترف المتهم بالتهمة الأولى و هي عدم الولاء للكويت
ك.م : لحظة يبا , الولاء بالصورة؟

المحقق : مسجّل بنادي القادسية ؟
ك.م : لا

المحقق : ما تمارس هواية الاشتراك بحاشية أحد الشيوخ؟
ك.م : لا

المحقق : على راسي , و قد اعترف المتهم بأنه يكره الأسرة الحاكمة و لا يشجع شبابها الله يطول بعمرهم
ك.م : أيداد بيداد

المحقق : التهمة الثانية , الولاء لدولة أجنبية , تعترف ؟
ك.م : شرم الشيخ؟

المحقق : لا يا حمار , ايران
ك.م : شلون صدتوني؟

المحقق : مراقبين كل تحركاتك يا خاين
ك.م : أي تحركات يا محترم؟

المحقق : تستعبط ؟ تنكر انك تروح خبّاز ايراني اللي بقطعة سلاسة ؟ شت , ثلاسة ؟ سلاثة ؟ خرا ثلاثثة؟
ك.م : يا ريت الأرض تنشق و تبلعني

المحقق : ماخذ بنتك معاك يعني مسوي تمويه ؟ عبالك ما ندري انك تضرب عالسمسم ؟
ك.م : استر على ما واجهت

المحقق : لا , توّ الناس , التهم وايد , حضرتك انسان خطير , أخطر من الصلال
ك.م : انت ليش معصب؟

المحقق : و قد اعترف المتهم بالولاء لدولة العدو الايراني و اصراره على أكل الخبز الايراني المسمسم و سماع أغاني معين
ك.م : خاكو سارت

المحقق : بعدك ما شفت شي , انت متهم بالتعامل مع أحزاب ارهابية محظورة , تعترف؟
ك.م : شفيك خايف؟ قول أي حزب

المحقق : حزب الله
ك.م : ما تحبهم؟

المحقق : لا , ما تدري انهم ارهابيين و مدعومين من ايران ؟
ك.م : بلا أدري , بس شسوي , قلبي يحبهم

المحقق : لابوك لابو قلبك , أشكرة تعترف انك تحبهم؟
ك.م : اي والله أحبهم , بس اذا مو عاجبينك عادي أغير

المحقق : تغيّر حق شنو؟
ك.م : اللي تبيه , البرشا ؟ الملكي ؟ اليوفي؟

المحقق : دلدغني , سجّل , اعترف المتهم بدعم حزب الله الارهابي و قد لوحظ أنه مضبط رنة تلفونه على أغاني محطة المنار
ك.م : تجيك التهايم و انت نايم , منو قال أدعمهم ؟ قلتلك أحبهم , و من طرف واحد بعد

المحقق : ابتلشنا فيكم يالعيم , يبا اذا لي هالدرجة تحب ايران ليش ما نحجزلك تذكرة بالعبارة ترد فيها ايران و تبرد دودتك ؟
ك.م : تعايرني بالعبّارة ؟ شدعوة يدّتك ياية الكويت بكونكورد و الا بنتلي كشف ؟ كلنا بالهوا سوا

المحقق : أشوفك طيّحت الميانة ؟
ك.م : لا والله , بس قلت نثري الحوار بسماع وجهة نظر الطرف الآخر

المحقق : والله لا أوديك بداهية , التهمة الرابعة – اعدام انشاءالله – تنظيم محاولة قلب نظام الحكم في الكويت , تعترف ؟
ك.م : لا والله ما اعترف , متى انقلبت أنا؟

المحقق : اذا أمريكا طقّت ايران شبتسوي؟
ك.م : أطلع مظاهرة بساحة الارادة

المحقق : و بعد؟
ك.م : أقاطع المنتجات الأمريكية و أبيع الفورد و أشتري هوندا

المحقق : و بعد؟
ك.م : احرق علم أمريكا عند سفارتهم

المحقق : عفية عالشاطر , و بعد؟
ك.م : كل هذا و بعد؟ ساعدني اذا عندك اقتراحات؟

المحقق : يعني ما راح تفجر منشآت نفطية ؟
ك.م : بالكويت؟

المحقق : اي بالكويت ؟
ك.م : لا

المحقق : ما راح تخطف طيّارة ؟
ك.م : لا , بس اذا تبيها تنخطف عندي واحد زقرتي مستعد يسويها

المحقق : منو , عماد مغنية ؟
ك.م : لا لا لا , الكويتي أنفع , واحد محليّ أصلي , الله يذكره بالخير ينقاله ليل ألين

المحقق : لي هالدرجة يحب حزب الله و ايران ؟
ك.م : مو بالضرورة , بس يخطفها عشان يطيحون القروض

المحقق : والله ما ينلام , شقونا هالبنوك
ك.م : اي والله , ما خلوا أحد مرتاح

المحقق : ماكو أخبار يديدة عن موضوع القروض ؟
ك.م : والله يقولون في أحكام قاعدة تطلع ضد البنوك اللي زايدة الدفعات و المدة

المحقق : و بو رمية ؟ ما صار عليه شي ؟
ك.م : لا والله ما عليه شي , خاموش هاليومين

المحقق : انت مع اسقاط القروض ؟
ك.م : لا والله انا ضد اسقاط القروض

المحقق : صج انك خيانة , سجّل عندك , اعترف المتهم بتنظيم خلية تهدف الى زعزعة أمن البلاد و قلب نظام الحكم
ك.م : يواش يواش , انا شقلت؟

حكمت محكمة أمن الدولة على المتهم كلّه عبدالله مطقوق بالصلب شنقا بالرصاص و ذلك لادانته بالتهم التالية , عدم الولاء للدولة , الولاء لدول أجنبية , دعم أحزاب ارهابية , محاولة الانقلاب على النظام , و عدم تأييد اسقاط القروض
________________________________________
.
طبعا ما يحتاج أوضح لكم بأن هذا الحوار خيالي و الشخصيات وهمية و أن مدونة كله مطقوق تقف قلبا و قالبا مع وزير الداخلية الرزة الرزين ذو الخد المتين و تصريحاته المطمئنة لجميع المواطنين , أيضا نؤيد جميع اجراءات أمن الدولة ضد المتهمين بالتأبين , حتى و ان كان فيها سحق للكرامات و كبت للحريات و تلفيق تهم و حبس البريئين , ألزم ما علينا راحة بال الوطن و سكوب و كل اللي توهم صاروا وطنيين
..
و عاشت الوحدة الوطنية

51 comments:

Bad-Ran said...

اففففففففف

:(

بو محمد said...

شر البلية ما يضحك و الله يا بو سلمى
صج صار الوضع أكبر نكته و الله
الواحد أصبح يقهقه بينما دموعه تنهمر
سبحانك يا رب
إي و الله سبحانك يا رب

'نعيب زماننا والعيب فينا، وما لزماننا عيب سوانا'

و السلام

Mr_CHoCoLaTe said...

عاش والله راعي الهوندا

بتصير من ربعنا هي هي


الا صج فلم اختطاف طائرة القروض

راح ينزل بالسينما مقطع و لا كامل ؟


و أنا اقول حق ليل ايلين روح سوها يبا سنة 2088 شباقي من العمر

و لا ما تبي تكون نهايتك مأساويه هي هي


تسلم ايدك يا بو سلمى

مع السلامه

Mozart said...

حكومة الكويت قاعده تحصد اللي زرعته في عقول المواطنين على مدى الثلاث عقود الفائته و اعني بذلك (التطرف الديني - الفئوية - الاصولية - القومية - نظريات المؤامرة - العنصرية)و النتيجة ان الكل قام يقول طز بالكويت في مصلحه مذهبي و
طائفتي و جماعتي و قبيلتي

Bu Jassem said...

يا خبر بفلوس
كلها كم يوم ويصير ببلاش
وترى كل النهايات قربت ويبي لها مخرج اوسكار يضبطها

al_tariq2009 said...

لا صج دمك خفيف مع انه شكلك ما يوحي :)

تحياتي بو سلمى

nEo said...

يازتلي شرم الشيخ

LOL

bo bader said...

ويلوموني ليش أحب العيم !!

والله ونيسين وطينتهم خفيفة ..

في مثل هذه الظروف ، من يقدر يخلينا نبتسم غير مطقوق ..

تحياتي يا الحبيب ..

====
خلنا نشوفك الليلة

حسافتج يا كويت said...

أبدعت
ولا نستغرب هذا اليوم

Judy Abbot said...

:)

poor alien .. shalakhtooh.

لا حياة لمن تنادي الخبر الحين صار عالمي الله يستر

Salah said...

LoL

:)

فتى الجبل said...

2088
تهقه بنعيش لي ذاك الوقت؟:p
والله يا بو سلمى ما ردنا قري الا التحالف الحكومي مع الاحزاب المتاسلمة السنية والشيعية
واللي منضرين بهالتحالف الكويت والناس اللي صج قلبهم على الديرة مو الحزب
اللي لاحق الاخوان المسلمين
واللي مع السلف
واللي طلع من السلف سلفية علمية
وثوابت امة
وحزب امة
وحزب الله
واحنا ضعنا مع خلق الله

Eng_Q8 said...

الله لا اييب هاليوم مع ان جن يانا

المهم اذا بغيت كفيل قولي :p

Mok said...

:)

دمك خفيف

LiL ALiEN said...

لووول

الله يغربل ابليسك

عاد تهقى اذا خطفت الطيارة راح يطلقون علي اسم "القرضاوي" ؟



على فكره سؤال: انت عليك قرض؟

اذا اجابتك "لأ" .. عيل سجل عندك .. انت مو كويتي .. وهذي تهمه يديده

Amethyst said...

Funny but scary satire..

blacklight said...

عزيزي مطقوق
أبدعت
إلغاء التعدديه , عدم تقبل الآخر , التطفل بشؤون الآخرين , انتهاك الحريات الشخصيه هو سمة من سمات مؤسسات الدوله طالما أن الشعب يعتقد أن هذه تسمى وطنيه
فلا تستغرب عودة الدكتاتوريه فالشعب غبي تسيره غريزة مقت الآخر بمباركة الدوله ومؤسساتها الخاليه من الحياد والإستقلاليه.

btw sharm el sheikh is overrated.

Hasan.B said...

Mobdi3 as usual

العرزاله said...

صور لاعبين منتخب المستقبل

اعضاء خلية انقلاب على الحكم

Maximilian said...

شي يضيق الخلق :/

بس ليش 2088 ؟؟

وايد اشياء من اللي قلتها واقع معاصر

سيدة نفسي said...

أسجل ابتسامة ألم أخي رغم الحوار المضحك .. الساخر الذي وضع مجهرا بحجم فضاءنا الرحب على قضية ما

وقد اعتدنا ذلك

تسلم ايدك

moowa6en said...

حوار ممتع وشيق
الله يعينك على قلمك

:)

كويــتي لايــعه كبــده said...

وجود حزب الات داخل الكويت ليس بأمر مضحك.

لا احد يريد دولة قمع الحريات ودولة "أمن الدولة" ودولة بوليسية دكتاتورية
وبنفس الوقت (حسب ضني) لا احد يريد الدفاع عن من يستورد لنا المشاكل من دول الجوار ويدافع عنهم بحجج رنانه.

لا نساهم بجعل "التلاحم والوحدة الوطنيه والتصدي للطائفيه وحرية الرأي" مجرد كروت تستخدم من قبل العابثين باستقرار البلد ل"ضد" هذه المفاهيم.

ليس كل من طلب محاسبة اتباع الاحزاب الخارجيه المعادية للكويت من اتباع الوثن أو سكوب أو توهم صاروا وطنيين.

كم اود ان اضحك لكن لما ارى ما يهب بنا تتبخر الابتسامه.

شكرا لك وللجميع

Snow White said...

لول..مادري اضحك :)ولا ابجي :( بس صج افتر راسنا مادري شصاير بالديرة الظاهر قاطين علينا عزيزو !!

kila ma6goog said...

السلام

هلا بالشباب الحلوين

بدران
:(

بو محمد
صدقت

سيد ككاو
ينزل مقطع , في لقطات عري

موزارت
حكومة لا ترى أبعد من ارنبة أنفها

بو جاسم
ما اعتقد نلقى مخرج يقبل بهالسيناريو المسخرة

الا جان وزير الداخلية عنده موهبة الاخراج

نيو
مقطوع سرك

الطارق
ليش شكلي ما يوحي؟

من صجك على كل هالسوالف ما طحت عالسالفة من قبل؟

بو بدر
أي ليلة؟

ناطرين الديوانية اليديدة

حسافة
مشكور قلبي

جودي
ما عندي دلع

صلاح
على مين؟

فتى
ما اعتقد الحكومة متحالفة مع أحد , حكومتنا ما تدري اهي شتبي بالضبط , واضح ان المركب ماشي بأكثر من نوخذة

أو ان ما فيه اي نوخذة

مهندس
كفيل حق شنو؟ اليوم دور زيد و باجر دور عبيد

موك
و أدق عود بعد

الارهابي الفضائي
ما علي بس شكلي باخذ قرض جريب

ولكم تو ذ كلوب

أمثست
:)

بلاك
ما حبيتها وايد , مالت عزوبية

حسن
حبيبي بو علي

ماكس
ان قلت الحين ممكن ما تلقوني باجر

العرزالة
أشكرة , خصوصا بو شعر كيرلي

مواطن
اي والله

سيدة
متشكر أوي

لايعة
الأخ العزيز كويتي لايعة جبده , صدقني احنا لاعت جبودنا أكثر منك , انا كنت ادرس في ولاية نيو يورك أثناء حدوث الارهاب هناك و شفت الاجراءات اللي قامت فيها السلطات الامريكية كردة فعل على الحادث

عمره ما كان حفظ أمان البلد يتم عن طريق الاهانة و تلفيق التهم و سحق كرامة الناس , خلك بعيد نظر و شوف أثر اللي قاعد يصير على عيالهم و أهلهم و قولي أي وطنية ستبقى في قلب من يرى أجهزة الدولة الرسمية تلفق و تختلق الاتهامات لوالده او عمه ؟

انا متفق معك بأني ضد التأبين و ليلحين ماني فاهم الجماعة شنو استفادوا منه و لكن هذا لن يعميني عن أخطاء الحكومة و أجهزة الدولة

اذا واحد راح حسينية يأبن صار مسوي انقلاب , عيل ما استبعد خلال كم يوم يتم استدعائي بتهمة التآمر و استدعائك بتهمة محاورة المتآمر و هلم جر

شكرا جزيلا على تعليقك , صدقني كنت محتاجه

سنو
عزيزو منو بعد؟ احنا عدنان و متوهقين فيه بعد عزيزو شبيسوي؟

مُحَسّدْ said...

بو سلمى

ابي عنوان الخباز اذا عنده خووش خبز
انا اضرب على المحلي مع السمسم :)

الاختلاف لا يفسد للود قضية

تحياتي

ana! said...

جك جك جك جك
تصفيق حار لمطقوق.. والله بالضبط هذا اللي قاعد يصير! و لله يستر من الياي

Shather said...

حراام علييييك ماقدر اضحكككككككككك


دير بالك عاد فيك عرج ارهابي :P

someone_q8 said...

السلام عليكم
الله لا اييب هاليوم اللي بنصير فيه جذيه
الايام دول يوم لك يوم عليك

HOTLINE said...

استغرب من اللي يروحون و يرجعون و يقولون

(الاختلاف لا يفسد للود قضية)

و هم نفسهم اللي مجبرتين القضيه من يدها السادس عشر قبل الميلاد


تسلم يا بو سلمى

حمودي said...

ولا اروع
بس حيرتني اظحك ولا ابجي ؟
تسلم

LiFe DRaMa said...

مطقوق

كتبت فأبدعت ... الوضع سخيف هالأيام بالبلد ... نسأل الله أن يسهل الأمور و أن تعود الأوضاع لطبيعتها اللي مادري متى كانت طبيعية يمكن في فترة بالستينات على ما اذكر نعم

و شغلة ثانية ... قلمك أمانة و مو من حقك اتوقف كتابة بو سلمى ... انشالة كل الموفقية نتمنالك على قولتهم

سلام

Zaydoun said...

ليش ننطر 2088؟ قول 2009... أو حتى الشهر الجاي

حمد said...

اللى صار ولا شي

الله يستر من اللي ياي

الانشقاق حقيقي ولا اقصد هنا الطائفي فقط

الانشقاق حقيقي حتى في الاتفاق على الدستور

تحية لك ..

وردة حب said...

لووووووووووووووووووووووووووووووووووووووووووووووووووووووووووووووووووووووووووووووووووول

خياااال وااسع مو للهدرجة عااااد

بليز لاتيبون طاري بورمية ياليت كل الناس مثلة

azoori said...

ويلوموني ليه احبك

اسلوبي راقي
اسلوب بصراحه مو قادر اوصفه
بس بصراحه اكتشف اكثر واكثر انك رائع

حلم جميل بوطن أفضل said...

مطقوق (الأصلي) يعود من جديد

kila ma6goog said...

السلام

يا هلا بالشباب

هلا بالحلوين

شسالفة البلاغات الكاذبة و النص صاجة؟

محسد
مشكلة ان الخباز اخرطي و الطابور عليه وايد , ما تحسون ان فيه ندرة خبازين بالكويت؟

انا اروحله مع سلومة عشان اوديها الفرع تشتري حلاو و بفك

أنا
بالضبط مع تغيير الأسامي

شذر
عرجي الارهابي شكله بيودرنا

سوم ون
بهالزمن صار واحد لك و عشرة عليك

الله كريم

هوت لاين
عادي يبا كل واحد يستجدي الأمن الذاتي و التصالح مع نفسه و ضميره

حمودي
حاول تسويهم مع بعض , و تعود على هالحالة للمرحلة المقبلة

دراما
خيلي متشكر أغاتي

حمد
دستور مين يابني ؟ لو في أحد يدري عنه جان هذا حالنا

بو الزيد
انت قلت , انا ما قلت , يا معود نبي جم سني معانا بأمن الدولة , السجن مليق اذا كله عيم

كااااااااااااااك

يعني انا كنت أفضل انسجن ايام نبيها خمسة مع الشباب الكول , بس الحين انسجن مع ربع عدنان الدينين , انتحر

وردة
اي والله بو رمية جايبها من الآخر

أزوري
أوكي , بوست عاجبكك مو مشكلة , بس تسميه راقي ؟ جنها قوية شوي

حلم
مو الخوف كله من الأصلي

سلام

هذيان said...

ما قالولك أمن الدولة من مراقبك

أخاف أنا
عاد عند ويهك
بعرفش السبب

قربها خلها 2008 ؟؟؟؟

عاجل said...

انت شيلونش

زينة؟؟؟؟
---
ك.م : لا نهووووووولا

فريج سعود said...

الي يشفع لك ان التحقيق ما كان سين وجيم على الطريقة المصرية
يعني افاك ما انجاس

mosan mosan said...

best post in a long time

azoori said...

اوبس جنها قويه بس شوي

:)
خطأ مطبعي

المقصود كانت كلمة
اسلوب
رايق

ناي said...

loOol ^^
khosh break bain lecturain (=

EXzombie said...

شلون 2088 و عمرك 30 سنة.....!!!؟

ذات عقل خشبيّ said...

لوووووووووول




تهقى تخلّص قبل شهـر 6 ؟


راح يمديني أردّ أفهم شالسالفة


ولا بنظل ضايعين بالطوشة ؟؟



مطقـوق أنا أحسّ إنكم قاعدين
تبـالغون ولا صج قاعد يصير بالكويت !!!!




سلام !

Mishari said...

القادسوية فيهم معارضة :(

هذا ظلم ظلم ظلم


بعدين اذا سألوك قول الخبز الايراني مع الرهش اكله تصير سعودية ويحوشك افراج

ابتسامة ساخرة في جهل مدقع

تراب الكويت said...

آآآآآآآآآآآآآآآآه

يا وطن

:(

kuwaitawy said...

شر البلية ما يضحك ههه

هههههه

مشكور على هالبوست



المحقق : تغيّر حق شنو؟))
ك.م : اللي تبيه , البرشا ؟ الملكي ؟ ((اليوفي؟

انصحك تحب اليوفي :)))

Nachla said...

you rock

RADIANT GUY said...

بصراحة ما هقيتها منك....كلش ما توقت هالشي منك....في أحد يشوف سكوب؟
لووووووووول